Dvepabbajitavatthu
p. 151 378. Evaṁ me sutaṁ–ekaṁ samayaṁ Bhagavā Kosambiyaṁ viharati Ghositārāme. Tena kho pana samayena dve pabbajitā Muṇḍiyo ca paribbājako Jāliyo ca Dārupattikantevāsī yena Bhagavā tenupasaṅkamiṁsu, upasaṅkamitvā Bhagavatā saddhiṁ sammodiṁsu, sammodanīyaṁ kathaṁ sāraṇīyaṁ vītisāretvā ekamantaṁ aṭṭhaṁsu, ekamantaṁ ṭhitā kho te dve pabbajitā Bhagavantaṁ etadavocuṁ “kiṁ nu kho āvuso Gotama taṁ jīvaṁ taṁ sarīraṁ, udāhu aññaṁ jīvaṁ aññaṁ sarīran”ti.
379. Tena hāvuso suṇātha sādhukaṁ manasi karotha bhāsissāmīti. “Evamāvuso”ti kho te dve pabbajitā Bhagavato paccassosuṁ. Bhagavā etadavoca. Idhāvuso Tathāgato loke uppajjati Arahaṁ Sammāsambuddho -pa-. (Yathā Sāmaññaphale, evaṁ vitthāretabbaṁ.) Evaṁ kho āvuso bhikkhu sīlasampanno hoti. -pa- paṭhamaṁ jhānaṁ upasampajja viharati. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, kallaṁ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vā -pa- dutiyaṁ jhānaṁ. Tatiyaṁ jhānaṁ. Catutthaṁ jhānaṁ upasampajja viharati. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, kallaṁ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vā -pa- ñāṇadassanāya cittaṁ abhinīharati abhininnāmeti. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, kallaṁ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vā.
p. 152 380. -pa- nāparaṁ itthattāyāti pajānāti. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, na kallaṁ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Idamavoca Bhagavā. Attamanā te dve pabbajitā Bhagavato bhāsitaṁ abhinandunti.