Mahālisutta

Brāhmaṇadūtavatthu

p. 143 359. Evaṁ me sutaṁ–ekaṁ samayaṁ Bhagavā Vesāliyaṁ viharati Mahāvane Kūṭāgārasālāyaṁ. Tena kho pana samayena sambahulā Kosalakā ca brāhmaṇadūtā Māgadhakā ca brāhmaṇadūtā Vesāliyaṁ paṭivasanti kenacideva karaṇīyena. Assosuṁ kho te Kosalakā ca brāhmaṇadūtā Māgadhakā ca brāhmaṇadūtā “samaṇo khalu bho Gotamo Sakyaputto Sakyakulā pabbajito Vesāliyaṁ viharati Mahāvane Kūṭāgārasālāyaṁ. Taṁ kho pana bhavantaṁ Gotamaṁ evaṁ kalyāṇo kittisaddo abbhuggato ‘itipi so Bhagavā Arahaṁ Sammāsambuddho Vijjācaraṇasampanno Sugato Lokavidū Anuttaro purisadammasārathi Satthā devamanussānaṁ Buddho Bhagavā’. So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti. So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāseti. Sādhu kho pana tathārūpānaṁ arahataṁ dassanaṁ hotī”ti.

360. Atha kho te Kosalakā ca brāhmaṇadūtā Māgadhakā ca brāhmaṇadūtā yena Mahāvanaṁ Kūṭāgārasālā tenupasaṅkamiṁsu. Tena kho pana samayena āyasmā Nāgito Bhagavato upaṭṭhāko hoti. Atha kho te Kosalakā ca brāhmaṇadūtā Māgadhakā ca brāhmaṇadūtā yenāyasmā Nāgito tenupasaṅkamiṁsu, upasaṅkamitvā āyasmantaṁ Nāgitaṁ etadavocuṁ “kahaṁ nu kho bho Nāgita etarahi so bhavaṁ Gotamo viharati, dassanakāmā hi mayaṁ taṁ bhavantaṁ Gotaman”ti. Akālo kho āvuso Bhagavantaṁ dassanāya, paṭisallīno Bhagavāti. Atha kho te Kosalakā ca brāhmaṇadūtā Māgadhakā ca brāhmaṇadūtā tattheva ekamantaṁ nisīdiṁsu “disvāva mayaṁ taṁ bhavantaṁ Gotamaṁ gamissāmā”ti.

Oṭṭhaddhalicchavīvatthu

p. 144 361. Oṭṭhaddhopi Licchavī mahatiyā Licchavīparisāya saddhiṁ yena Mahāvanaṁ Kūṭāgārasālā yenāyasmā Nāgito tenupasaṅkami, upasaṅkamitvā āyasmantaṁ Nāgitaṁ abhivādetvā ekamantaṁ aṭṭhāsi, ekamantaṁ ṭhito kho Oṭṭhaddhopi Licchavī āyasmantaṁ Nāgitaṁ etadavoca “kahaṁ nu kho bhante Nāgita etarahi so Bhagavā viharati Arahaṁ Sammāsambuddho, dassanakāmā hi mayaṁ taṁ Bhagavantaṁ Arahantaṁ Sammāsambuddhan”ti. Akālo kho Mahāli Bhagavantaṁ dassanāya, paṭisallīno Bhagavāti. Oṭṭhaddhopi Licchavī tattheva ekamantaṁ nisīdi “disvāva ahaṁ taṁ Bhagavantaṁ gamissāmi Arahantaṁ Sammāsambuddhan”ti.

362. Atha kho Sīho samaṇuddeso yenāyasmā Nāgito tenupasaṅkami, upasaṅkamitvā āyasmantaṁ Nāgitaṁ abhivādetvā ekamantaṁ aṭṭhāsi, ekamantaṁ ṭhito kho Sīho samaṇuddeso āyasmantaṁ Nāgitaṁ etadavoca “ete bhante Kassapa sambahulā Kosalakā ca brāhmaṇadūtā Māgadhakā ca brāhmaṇadūtā idhūpasaṅkantā Bhagavantaṁ dassanāya, Oṭṭhaddhopi Licchavī mahatiyā Licchavīparisāya saddhiṁ idhūpasaṅkanto Bhagavantaṁ dassanāya, sādhu bhante Kassapa labhataṁ esā janatā Bhagavantaṁ dassanāyā”ti. Tena hi Sīha tvaññeva Bhagavato ārocehīti. “Evaṁ bhante”ti kho Sīho samaṇuddeso āyasmato Nāgitassa paṭissutvā yena Bhagavā tenupasaṅkami, upasaṅkamitvā Bhagavantaṁ abhivādetvā ekamantaṁ aṭṭhāsi, ekamantaṁ ṭhito kho Sīho samaṇuddeso Bhagavantaṁ etadavoca “ete bhante sambahulā Kosalakā ca brāhmaṇadūtā Māgadhakā ca brāhmaṇadūtā idhūpasaṅkantā Bhagavantaṁ dassanāya, Oṭṭhaddhopi Licchavī mahatiyā Licchavīparisāya saddhiṁ idhūpasaṅkanto Bhagavantaṁ dassanāya, sādhu bhante labhataṁ esā janatā Bhagavantaṁ dassanāyā”ti. Tena hi Sīha vihārapacchāyāyaṁ āsanaṁ paññapehīti. “Evaṁ bhante”ti kho Sīho samaṇuddeso Bhagavato paṭissutvā vihārapacchāyāyaṁ āsanaṁ paññapesi.

p. 145 363. Atha kho Bhagavā vihārā nikkhamma vihārapacchāyāyaṁ paññatte āsane nisīdi. Atha kho te Kosalakā ca brāhmaṇadūtā Māgadhakā ca brāhmaṇadūtā yena Bhagavā tenupasaṅkamiṁsu, upasaṅkamitvā Bhagavatā saddhiṁ sammodiṁsu, sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Oṭṭhaddhopi Licchavī mahatiyā Licchavīparisāya saddhiṁ yena Bhagavā tenupasaṅkami, upasaṅkamitvā Bhagavantaṁ abhivādetvā ekamantaṁ nisīdi.

364. Ekamantaṁ nisinno kho Oṭṭhaddho Licchavī Bhagavantaṁ etadavoca “purimāni bhante divasāni purimatarāni Sunakkhatto Licchaviputto yenāhaṁ tenupasaṅkami, upasaṅkamitvā maṁ etadavoca ‘yadagge ahaṁ Mahāli Bhagavantaṁ upanissāya viharāmi, na ciraṁ tīṇi vassāni, dibbāni hi kho rūpāni passāmi piyarūpāni kāmūpasaṁhitāni rajanīyāni, no ca kho dibbāni saddāni suṇāmi piyarūpāni kāmūpasaṁhitāni rajanīyānī’ti, santāneva nu kho bhante Sunakkhatto Licchaviputto dibbāni saddāni nāssosi piyarūpāni kāmūpasaṁhitāni rajanīyāni, udāhu asantānī”ti.

Ekaṁsabhāvitasamādhi

365. Santāneva kho Mahāli Sunakkhatto Licchaviputto dibbāni saddāni nāssosi piyarūpāni kāmūpasaṁhitāni rajanīyāni, no asantānīti. Ko nu kho bhante hetu, ko paccayo, yena santāneva Sunakkhatto Licchaviputto dibbāni saddāni nāssosi piyarūpāni kāmūpasaṁhitāni rajanīyāni, no asantānīti.

366. Idha Mahāli bhikkhuno puratthimāya disāya ekaṁsabhāvito samādhi hoti dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ. So puratthimāya disāya ekaṁsabhāvite samādhimhi dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ. Puratthimāya disāya dibbāni rūpāni passati piyarūpāni kāmūpasaṁhitāni rajanīyāni, no ca kho dibbāni saddāni suṇāti piyarūpāni kāmūpasaṁhitāni rajanīyāni. Taṁ kissa hetu, evaṁ hetaṁ Mahāli hoti bhikkhuno puratthimāya disāya ekaṁsabhāvite samādhimhi dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ.

p. 146 367. Puna caparaṁ Mahāli bhikkhuno dakkhiṇāya disāya -pa-. Pacchimāya disāya. Uttarāya disāya. Uddhamadho tiriyaṁ ekaṁsabhāvito samādhi hoti dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ. So uddhamadho tiriyaṁ ekaṁsabhāvite samādhimhi dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ. Uddhamadho tiriyaṁ dibbāni rūpāni passati piyarūpāni kāmūpasaṁhitāni rajanīyāni, no ca kho dibbāni saddāni suṇāti piyarūpāni kāmūpasaṁhitāni rajanīyāni. Taṁ kissa hetu, evaṁ hetaṁ Mahāli hoti bhikkhuno uddhamadho tiriyaṁ ekaṁsabhāvite samādhimhi dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ.

368. Idha Mahāli bhikkhuno puratthimāya disāya ekaṁsabhāvito samādhi hoti dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ. So puratthimāya disāya ekaṁsabhāvite samādhimhi dibbānaṁ savanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ. Puratthimāya disāya dibbāni saddāni suṇāti piyarūpāni kāmūpasaṁhitāni rajanīyāni, no ca kho dibbāni rūpāni passati piyarūpāni kāmūpasaṁhitāni rajanīyāni. Taṁ kissa hetu, evaṁ hetaṁ Mahāli hoti bhikkhuno puratthimāya disāya ekaṁsabhāvite samādhimhi dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ.

369. Puna caparaṁ Mahāli bhikkhuno dakkhiṇāya disāya -pa-. Pacchimāya disāya. Uttarāya disāya. Uddhamadho tiriyaṁ ekaṁsabhāvito samādhi hoti dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ. So uddhamadho tiriyaṁ ekaṁsabhāvite samādhimhi dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ. Uddhamadho tiriyaṁ dibbāni saddāni suṇāti piyarūpāni kāmūpasaṁhitāni rajanīyāni, no ca kho dibbāni rūpāni passati piyarūpāni kāmūpasaṁhitāni rajanīyāni. Taṁ kissa hetu, evaṁ hetaṁ Mahāli hoti bhikkhuno uddhamadho tiriyaṁ ekaṁsabhāvite samādhimhi dibbānaṁ saddānaṁ savanāya piyarūpānaṁ kāmūpasaṁhitānaṁ rajanīyānaṁ, no ca kho dibbānaṁ rūpānaṁ dassanāya piyarūpānaṁ kāmūpasaṁhitānaṁ rajanīyānaṁ.

p. 147 370. Idha Mahāli bhikkhuno puratthimāya disāya ubhayaṁsabhāvito samādhi hoti dibbānañca rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, dibbānañca saddānaṁ savanāya piyarūpānaṁ kāmūpasaṁhitānaṁ rajanīyānaṁ. So puratthimāya disāya ubhayaṁsabhāvite samādhimhi dibbānañca rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, dibbānañca saddānaṁ savanāya piyarūpānaṁ kāmūpasaṁhitānaṁ rajanīyānaṁ. Puratthimāya disāya dibbāni ca rūpāni passati piyarūpāni kāmūpasaṁhitāni rajanīyāni, dibbāni ca saddāni suṇāti piyarūpāni kāmūpasaṁhitāni rajanīyāni. Taṁ kissa hetu, evaṁ hetaṁ Mahāli hoti bhikkhuno puratthimāya disāya ubhayaṁsabhāvite samādhimhi dibbānañca rūpānaṁ dassanāya piyarūpānaṁ kāmūpasaṁhitānaṁ rajanīyānaṁ dibbānañca saddānaṁ savanāya piyarūpānaṁ kāmūpasaṁhitānaṁ rajanīyānaṁ.

371. Puna caparaṁ Mahāli bhikkhuno dakkhiṇāya disāya -pa-. Pacchimāya disāya. Uttarāya disāya. Uddhamadho tiriyaṁ ubhayaṁsabhāvito samādhi hoti dibbānañca rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, dibbānañca saddānaṁ savanāya piyarūpānaṁ kāmūpasaṁhitānaṁ rajanīyānaṁ. So uddhamadho tiriyaṁ ubhayaṁsabhāvite samādhimhi dibbānañca rūpānaṁ dassanāya piyarūpānaṁ kāmūpasaṁhitānaṁ rajanīyānaṁ dibbānañca saddānaṁ savanāya piyarūpānaṁ kāmūpasaṁhitānaṁ rajanīyānaṁ. Uddhamadho tiriyaṁ dibbāni ca rūpāni passati piyarūpāni kāmūpasaṁhitāni rajanīyāni, dibbāni ca saddāni suṇāti piyarūpāni kāmūpasaṁhitāni rajanīyāni. Taṁ kissa hetu, evaṁ hetaṁ Mahāli hoti bhikkhuno uddhamadho tiriyaṁ ubhayaṁsabhāvite samādhimhi dibbānañca rūpānaṁ dassanāya piyarūpānaṁ kāmūpasaṁhitānaṁ rajanīyānaṁ, dibbānañca saddānaṁ savanāya piyarūpānaṁ kāmūpasaṁhitānaṁ rajanīyānaṁ. Ayaṁ kho Mahāli hetu ayaṁ paccayo. Yena santāneva Sunakkhatto Licchaviputto dibbāni saddāni nāssosi piyarūpāni kāmūpasaṁhitāni rajanīyāni, no asantānīti.

p. 148 372. Etāsaṁ nūna bhante samādhibhāvanānaṁ sacchikiriyāhetu bhikkhū Bhagavati brāhmacariyaṁ carantīti. Na kho Mahāli etāsaṁ samādhibhāvanānaṁ sacchikiriyāhetu bhikkhū mayi brahmacariyaṁ caranti, atthi kho Mahāli aññeva dhammā uttaritarā ca paṇītatarā ca, yesaṁ sacchikiriyāhetu bhikkhū mayi brahmacariyaṁ carantīti.

Catu-ariyaphala

373. Katame pana te bhante dhammā uttaritarā ca paṇītatarā ca, yesaṁ sacchikiriyāhetu bhikkhū Bhagavati brahmacariyaṁ carantīti. Idha Mahāli bhikkhu tiṇṇaṁ saññojanānaṁ parikkhayā Sotāpanno hoti avinipātadhammo niyato sambodhiparāyaṇo. Ayampi kho Mahāli dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṁ caranti. Puna caparaṁ Mahāli bhikkhu tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva¹ imaṁ lokaṁ āgantvā dukkhassantaṁ karoti. Ayampi kho Mahāli dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṁ caranti. Puna caparaṁ Mahāli bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā. Ayampi kho Mahāli dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṁ caranti. Puna caparaṁ Mahāli bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati. Ayampi kho Mahāli dhammo uttaritaro ca paṇītataro ca yassa sacchikiriyāhetu bhikkhū mayi brahmacariyaṁ caranti. Ime kho te Mahāli dhammā uttaritarā ca paṇītatarā ca yesaṁ sacchikiriyāhetu bhikkhū mayi brahmacariyaṁ carantīti.

Ariya-aṭṭhaṅgikamagga

p. 149 374. Atthi pana bhante maggo atthi paṭipadā etesaṁ dhammānaṁ sacchikiriyāyāti. Atthi kho Mahāli maggo atthi paṭipadā etesaṁ dhammānaṁ sacchikiriyāyāti.

375. Katamo pana bhante maggo katamā paṭipadā etesaṁ dhammānaṁ sacchikiriyāyāti. Ayameva ariyo aṭṭhaṅgiko maggo. Seyyathidaṁ, sammādiṭṭhi sammāsaṅkappo sammāvācā sammākammanto sammā-ājīvo sammāvāyāmo sammāsati sammāsamādhi. Ayaṁ kho Mahāli maggo ayaṁ paṭipadā etesaṁ dhammānaṁ sacchikiriyāya.

Dvepabbajitavatthu

376. Ekamidāhaṁ Mahāli samayaṁ Kosambiyaṁ viharāmi Ghositārāme. Atha kho dve pabbajitā Muṇḍiyo ca paribbājako Jāliyo ca Dārupattikantevāsī yenāhaṁ tenupasaṅkamiṁsu, upasaṅkamitvā mayā saddhiṁ sammodiṁsu, sammodanīyaṁ kathaṁ sāraṇīyaṁ vītisāretvā ekamantaṁ aṭṭhaṁsu, ekamantaṁ ṭhitā kho te dve pabbajitā maṁ etadavocuṁ “kiṁ nu kho āvuso Gotama taṁ jīvaṁ taṁ sarīraṁ, udāhu aññaṁ jīvaṁ aññaṁ sarīran”ti.

377. Tena hāvuso suṇātha sādhukaṁ manasi karotha bhāsissāmīti. “Evamāvuso”ti kho te dve pabbajitā mama paccassosuṁ. Ahaṁ etadavocaṁ. Idhāvuso Tathāgato loke uppajjati Arahaṁ Sammāsambuddho -pa-. (Yathā Sāmaññaphale, evaṁ vitthāretabbaṁ.) Evaṁ kho āvuso bhikkhu sīlasampanno hoti. -pa- paṭhamaṁ jhānaṁ upasampajja viharati. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, kallaṁ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vā -pa- dutiyaṁ jhānaṁ. Tatiyaṁ jhānaṁ. Catutthaṁ jhānaṁ upasampajja viharati. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, kallaṁ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vā -pa- ñāṇadassanāya cittaṁ abhinīharati abhininnāmeti. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, kallaṁ¹ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vā. -pa- nāparaṁ itthattāyāti pajānāti. Yo kho āvuso bhikkhu evaṁ jānāti evaṁ passati, kallaṁ nu kho tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Yo so āvuso bhikkhu evaṁ jānāti evaṁ passati, na kallaṁ tassetaṁ vacanāya “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Ahaṁ kho panetaṁ āvuso evaṁ jānāmi evaṁ passāmi. Atha ca panāhaṁ na vadāmi “taṁ jīvaṁ taṁ sarīran”ti vā “aññaṁ jīvaṁ aññaṁ sarīran”ti vāti. Idamavoca Bhagavā. Attamano Oṭṭhaddho Licchavī Bhagavato bhāsitaṁ abhinandīti.